«Liverpul» «Qalatasaray»ı darmadağın edərək ÇL-də 1/4 finala yüksəldi: Salahdan tarixi rekord və Cerrarddan sərt tənqid
Çempionlar Liqasının 1/8 final mərhələsinin cavab oyununda «Liverpul» öz meydanında «Qalatasaray»ı qəbul edib. «Enfild» stadionunda keçirilən matçda İngiltərə təmsilçisi 4:0 hesabı ilə inamlı qələbə qazanaraq adını 1/4 finala yazdırıb. Xatırladaq ki, cütlüyün ilk oyununda «Qalatasaray» 1:0 hesabı ilə qalib gəlmişdi.
Qollar, qaçırılan penalti və Salahın benefisi
Oyunun hesabı 25-ci dəqiqədə açılıb – Dominik Soboslai fərqlənib. İlk hissənin sonlarında Məhəmməd Salah penaltidən vurduğu zərbəni qola çevirə bilməyib, qapıçı Uğurcan Çakır topu dəf edib.
Lakin ikinci hissədə mersisaydlılar qol yağışına başlayıblar. 51-ci dəqiqədə Hüqo Ekitike, 53-cü dəqiqədə isə Rayan Qravenberx fərqlənərək hesabı darmadağın səviyyəsinə çatdırıblar. 62-ci dəqiqədə isə matçda həm də bir məhsuldar ötürmə (asist) ilə yadda qalan Salah oyun epizodundan fərqlənərək matçın yekun hesabını müəyyənləşdirib.
Salahdan tarixi nailiyyət
«Qalatasaray»ın qapısına vurulan qol Məhəmməd Salah üçün yubiley xarakteri daşıyıb. Misirli vinger Çempionlar Liqasında qollarının sayını 50-yə çatdırıb. O, turnir tarixində bu göstəriciyə çatan ilk afrikalı futbolçu olaraq tarixə düşüb. Hazırda Salah ÇL tarixinin ən yaxşı bombardirləri siyahısında Tyerri Anri ilə birlikdə 10-cu yeri bölüşür.
«Enfild»də qorxulu anlar: Noa Lanq xəstəxanalıq oldu
Matçın 75-ci dəqiqəsində «Qalatasaray»ın yarımmüdafiəçisi Noa Lanq ciddi zədə alıb. Niderlandlı futbolçu meydanın kənarındakı reklam lövhəsinə çırpılaraq əl barmağını ağır yaralayıb. Qanaxması olan oyunçu bir müddət qazonda qalıb.
Tibbi personal ona bir neçə dəqiqə yardım etdikdən sonra futbolçunu xərəkdə meydandan çıxarıb. Lanq bu zaman əllərini yuxarıda tutub. Onun yerinə meydana Mauro İkardi daxil olub. «Napoli»dən icarəyə götürülmüş oyunçunu «Enfild» tribunaları alqışlarla yola salıb. Məlumata görə, xəstəxanaya göndərilən vinger əməliyyat olunacaq.
Arne Slot və Stiven Cerrarddan «Qalatasaray»a sərt sözlər
«Liverpul»un baş məşqçisi Arne Slot matçdan sonra komandasının oyunundan tam razı qaldığını bildirib:
«Oyunun demək olar ki, hər dəqiqəsindən zövq aldım. Necə oynadığımız, necə presinq etdiyimiz və ‘Qalatasaray’ mənim onlardan gözlədiyim kimi yerdə uzanaraq, əllərini yelləyərək tempimizi aşağı salmağa çalışanda azarkeşlərimizin və oyunçularımızın buna reaksiyası xoşuma gəldi. Bu gün rəqibin, düşünürəm ki, heç bir şansı yox idi. Təəssüfləndiyim yeganə məqam odur ki, bütün mövsüm boyu istifadə etdiyimizdən qat-qat çox şans yaradırıq. Hətta bu gün də xG (gözlənilən qollar) göstəricimiz vurduğumuz 4 qoldan daha yüksəkdir!»
«Liverpul»un sabiq kapitanı Stiven Cerrard isə «TNT Sports»un efirində Türkiyə klubunun oyun tərzini daha sərt tənqid edib:
«İnsanlar dinamik oyuna baxmağa gəlmişdilər, onlar isə yerdə sürünürdülər. Bu gün onlar ilk dəqiqədən sonuncu dəqiqəyədək rüsvay oldular. Ümumi oyunları zəif, hətta acınacaqlı idi, bir də üstəlik futbolçular qazonda yuvarlanırdılar. Bu gün biləklə bağlı bir neçə real zədə oldu ki, bunlara hörmətlə yanaşmaq lazımdır. Peşəkar kimi belə zədələri görmək istəməzsən. Lakin sonra görürsən ki, heç kimin demək olar toxunmadığı adamlar yerdə qıvrılır. Buna görə cəzalandırırlar. Onlar ilk hissənin sonunda cəmi 5 dəqiqə futbol oynadılar və daha sərt cəzalandırıldılar. Matçın sonunadək cəmi 11 dəqiqə futbol oynadılar. Hesab 11:0 və ya 12:0 ola bilərdi. ‘Liverpul’ çox asanlıqla qalib gəldi.»
